La seimana pasáa espenzó la primovera. Trés dos días con temperaturas de mas de 25º, cudé que bía allegau'l momentu guardar los jersés i los abrigos. Es el tiempu la color, la levedá, las sandalias i las camisetas. Piru esta uperación enevitabli tamién trai un lande dicisionis basalis. Enos armarios l'espaciu es siempri'l mesmu mientres que la ropa, conos años, hispe de mou esponincial. La mi güela jacía puntu con airi, la mi madri era una maestra'l bordau i yo nací en plenu iviernu: ricibir daos de jersés i bofandas pol mi cumple jue un ritu duranti añáas. Siguramenti teno mas de los que nito. Piru cuandu los veo allí, acaldaos en sus quilmas de prásticu, nu soi pa jacer denguna criba. Cáa unu d'esos jersés tien su hestoria sellenca, que a la vega jorma parti la mía.
Abora que la cris echó la galga la idulatría los ojetos i a la ubligación d'atesorar a tóa costa un coloñu posesionis talmenti ennecesarias, quicías allegó'l momentu cavilar sobri'l verdaeru valor de las cosas. Alcuerdome que la mi güela, nacía prencipios del siglu pasau, jacía acopio tóa clas de gomas, anfileris, cintas, butonis, ensin tichar náa la basura. ¡Y esu por nu parlar de la cumía! Nu s'esmanaban ne las miajas. Las cosas s'arrespetaban i se caltenian porque eran útilis. N'un mundu que se ajoga enti lo enútil i lo ejímeru, es fáci dar güeltas de un lau a otru, de la enfelicidá por nu asganzar a tiner tolo que se mos ofreci jasta, nel lau escontrariu, el aborrecer tolo material.
Entós viendo que ambas moviciones están mu alejáas de mi jorma cudar, jaz tiempu que prestami una tercer oción, que pudíamos allamar "la vía'l agraecimientu". Doi las gracias a los mis jersés, porque cáa unu d'ellos me parla de quin jizome'l dau, de la uveja que diome la lana, de las presonas que trebajarin pa teñila, de los iviernos asgaya que protegiomi'l fríu. Teno'l mesmu sentimientu col mi cochi. Alleva 10 añáas juncionandu perfeutamenti i aspero que lu siga jaciendu polo menos 10 mas. Cambearé de cochi solu cuandu veami ubligáa a jacelo (es icir, cuandu ya nu sea p'arrancar mas) i sedrá, en tou casu, un duru momentu.
Amar las cosas mos evita acumulalas por una simpli custión de bulimia u vacíu enterior. Mos impidi derrochar tirandu ojetos que son entá prefeutamenti útilis. Mos disuadi d'agotar los ricursos naturalis i d'aumentar la cantidá risiduos reciclaos. Hai d'arrespetar las cosas pos la su hestoria, pola inergía i el desjuerzu que s'invirtierin pa jacelos i pol luegar que ucuparin en muestra vida. Dendi la cafetera la mañana jasta la cama pola nochi, muestros días están comblaos d'estos humildis i prauticos servioris. Ser coscientis d'ellu (i estar, por tantu, agraecios) mos espanta pa siempri esi gran error cunsumista que querría lo escontrariu. L'hombri al serviciu las cosas i nu las cosas al seviciu l'hombri.
Entradas
No hay comentarios:
Publicar un comentario