viernes, 31 de mayo de 2013

JAMBRUNA

Unas entráas más abaju escribí un testu titulau CAVA POLA VITORIA que diba atentu la muvición entarajiláa pol gubiernu englés enanque`l su pueblu sofría las consecuencias de la Sigunda Guerra Mundial. Nesi escritu decliné qu`el suministru d`alimentos a Engalaterra, por aquel entós, sofría ataques marítimos y no bía una currienti cuntina d`esos bienis. Bien, agora, a manu vien aunir aquel testu col que escribo derreu, depués de leyer el libru Cojecha arrobáa de Vandana Shiva.

Hebo una gran jambruna ena India nel añu 1943. Más de 3 millonis de presonas morrierin y más de 20 millonis viérinse afeutaos por tala jambruna. D`aquella, la India era la base d`aprovisionamientu del ejércitu británicu, en guerra en dellos continentis. 80.000 toneláas de trigu juerin desportáas dendi Bengala, aondi allegaba`l trigu (y arroz) despropiau pol imperiu, una quinta parte de la produción india. La región de Bengala aportó dos terceras partes de la su cojecha. Cientos de milentas de presonas emigrarin a otras zonas d`India, comu Calcuta. Pol caminu medró la especulación y l`acaparamientu de los comerciantis que subierin los precios a buscu d`un beneficiu fácil. Medró`l númeru de cadáveris enas cunetas, mientres una marcha júnebre de labraoris, pescaoris y artesanos bengalís escarceaban otra tierra. Milentas de mojeris y neñas juerin vendías, cunvirtías en prostitutas. Los neños tamién juerin vendíos y, enas calles, los perros s`engarraban polos cuerpos de los quienis estaban más mortanos que vivos.

Al simen d`una quema, pola India s`espibló una muvición de mogura a la despropiación autorizáa pol Imperiu Británicu: la muvición Tebhaga. Tebhaga sinifica "dos tercios" y allegó a desarrollase en 19 distritos, participando más de 6 millonis de labraoris. Éstos, repuchábanse a dá-la su cojecha, siendo acusaos, entós, d`arrobu. Poca tiempu enantis, dendi`l tardíu de 1942, Mohandas Gandhi encetó l`apeldáa pola endependencia al griju de Quit India!, "¡marchin d`India!". Lo que sigui, es más u menos currutu por nos...

sábado, 25 de mayo de 2013

UN ARTÍCULU DE SUSANNA TAMARU...

                     Gracias, Jersé

La seimana pasáa espenzó la primovera. Trés dos días con temperaturas de mas de 25º, cudé que bía allegau'l momentu guardar los jersés i los abrigos. Es el tiempu la color, la levedá, las sandalias i las camisetas. Piru esta uperación enevitabli tamién trai un lande dicisionis basalis. Enos armarios l'espaciu es siempri'l mesmu mientres que la ropa, conos años, hispe de mou esponincial. La mi güela jacía puntu con airi, la mi madri era una maestra'l bordau i yo nací en plenu iviernu: ricibir daos de jersés i bofandas pol mi cumple jue un ritu duranti añáas. Siguramenti teno mas de los que nito. Piru cuandu los veo allí, acaldaos en sus quilmas de prásticu, nu soi pa jacer denguna criba. Cáa unu d'esos jersés tien su hestoria sellenca, que a la vega jorma parti la mía.
Abora que la cris echó la galga la idulatría los ojetos i a la ubligación d'atesorar a tóa costa un coloñu posesionis talmenti ennecesarias, quicías allegó'l momentu cavilar sobri'l verdaeru valor de las cosas. Alcuerdome que la mi güela, nacía prencipios del siglu pasau, jacía acopio tóa clas de gomas, anfileris, cintas, butonis, ensin tichar náa la basura. ¡Y esu por nu parlar de la cumía! Nu s'esmanaban ne las miajas. Las cosas s'arrespetaban i se caltenian porque eran útilis. N'un mundu  que se ajoga enti lo enútil i lo ejímeru, es fáci dar güeltas de un lau a otru, de la enfelicidá por nu asganzar a tiner tolo que se mos ofreci jasta, nel lau escontrariu, el aborrecer tolo material.
Entós viendo que ambas moviciones están mu alejáas de mi jorma cudar, jaz tiempu que prestami una tercer oción, que pudíamos allamar "la vía'l agraecimientu". Doi las gracias a los mis jersés, porque cáa unu d'ellos me parla de quin jizome'l dau, de la uveja que diome la lana, de las presonas que trebajarin pa teñila, de los iviernos asgaya que protegiomi'l fríu. Teno'l mesmu sentimientu col mi cochi. Alleva 10 añáas juncionandu perfeutamenti i aspero que lu siga jaciendu polo menos 10 mas. Cambearé de cochi solu cuandu veami ubligáa a jacelo (es icir, cuandu ya nu sea p'arrancar mas) i sedrá, en tou casu, un duru momentu.
Amar las cosas mos evita acumulalas por una simpli custión de bulimia u vacíu enterior. Mos impidi derrochar tirandu ojetos que son entá prefeutamenti útilis. Mos disuadi d'agotar los ricursos naturalis i d'aumentar la cantidá risiduos reciclaos. Hai d'arrespetar las cosas pos la su hestoria, pola inergía i el desjuerzu que s'invirtierin pa jacelos i pol luegar que ucuparin en muestra vida. Dendi la cafetera la mañana jasta la cama pola nochi, muestros días están comblaos d'estos humildis i prauticos servioris. Ser coscientis d'ellu (i estar, por tantu, agraecios) mos espanta pa siempri esi gran error cunsumista que querría lo escontrariu. L'hombri al serviciu las cosas i nu las cosas al seviciu l'hombri.

viernes, 24 de mayo de 2013

L`ANTICIPACIÓN

La estrategia l`anticipación requier una visualidá y una certía p`asganzar ojetivos de baju livel, pintu`l casu nel juegu l`ajedrez u, enti las grandes empresas tresnacionales, a una altor muchu mayor. Nesti últimu casu entran en juegu dellas componencias que consueldin esi proyeutu anticipaor nel que s`embarcan y no se vaiga, ésti, al tachu. Esti juegu d`estrategias y entramañas alquier nel mundu globalizau un geitu violentu, peru con viecos parcialis qu`estorreguin talangueras. Mijor polas güenas que polas malas. Trátase de caltené-la tobera enanque duri la comedia.
Grandis ojetivos de gobiernos y tresnacionales, entidaes ambas que son cuasi pal cuasi, sedrán l`escarceu de juentes d`inirgía, enteinase escarceando y ajirmando la posesión d`arrecursos, la omnipresenti propaganda y l`espible de las sus redes d`influencia. Los gobiernos caberos d`esti mundu s`escorrean, hipocritamenti, en dar una visual dabli de la su aición internacional, y d`otra manu, esa perralla s`encisca entumiando a probis gobiernos de probis países. Hai vegáas que sedrá enforma con una promesa al pajarón presidente de turnu, sedrá ésta una retaporción enos beneficios u facilidaes pa consiguir un pelotazu, que nestos tiempos d`encertía, convién tener bien comblau`l ralengu. N`otras vegáas, sedrá la diplomacia secreta la qu`encete los sus pasos. Estas muviciones aprendin las más destrañas migas y curiosos collazos de viaji.
Acancémomos de los interesis españolis en Latinamérica, con Repsol enchirtando los caminos enos callejos ministerialis. Endesa, Telefónica, Bancu Sanander, etc. Interesis al estrincote que pocu jacin pol bien públicu y general, que tienin una visual del mundu comu un negociu especulativu y desalmau. L`augua, el petroliu, el carbón, el gas, l`uraniu, el cobre,… jasta las granas son del apetegu de las grandis empresas del seutor: Monsanto, Syngenta, DuPont, Carhill, Diageo, Bunge, Unilever y Yara. Dendi jaz cuasi una década, estas empresas espiblan las sus clines de pulpe por tierras africanas. Tanzania desconoz pizootías qu`acemangan a las granas n`otros esgonces del planeta. Tanzania es un ojetivu caberu, peru tamién Burkina Fasu, Costa de Marfil y otros.
Amecémomos al su espiche atentu la necesidá d`alimentar a los paísis probis, de producir alimentos allí ondi s`atanguan. El güenismu escenificau. No sacarán a la luz que dendi que la libertá de patente está enas sus manos, cona descusa de cojechar “super-alimentos”, la jambruna es el platu que más se sirvi por meyu mundu, y sigui nantando; tampocu aventarán que los contratos leoninos juerzan a los agricultoris a soicidase al no ser a pagar el caricosti añual de las granas tresgénicas (casu descandalosu de la India) u, son despulsaos p`acupá-las sus tierras (Tanzania) u, finan cona soberanía alimentaria de los pueblos. Enanque las sus juchas medran, el restu la humanidá sobrevivi a gangu d`atraese, logicamenti, a esos ricos hombris de negocios del hemisferiu`l cierzu que viajan n`avión vestíos de deseñu, con corbatas de seda y antiparras escuras. Éstas, embotijan, a la empar que protegin la miráa de la crudura la rialidá desterior. Tamién están ajambraos, peru de lucru.

lunes, 20 de mayo de 2013

LETURAS ACOLECHANTES

D`un tiempu caracá la fición no me jala. Inténtolo y no soi a abuzar nesa mar de letras. Encontóo, los ensayos sí son materia enos que echame un güen col. Etapas, dígome que son etapas.

Nesti momentu, y conos altibajes que produz la su letura, tengo a meyu leyer "Otra alimentación es posible" de Claude Aubert, emprentau pola editorial La Fertilidad de la Tierra (2011). Digo a meyu leyer porque no soi a leyer derreu, pos enjábame y déjame jechu un coloñu tala cantidá d`información atropau al rote la salú acemangáa pola industria soicida alimentaria y agrícola. Estudios con conclusiones qu`espiblan la murnia por doquier, informes centíficos que deprendin un juturu de pocas décadas nel que la humanidá s`apetará al su descaste u dicimación comu lazu... duru, jartu duru, especialmenti porque Aubert no es una presona que trebaji la negatividá, al revés, adeícase dendi décadas a enrobrar tolo caniegu qu`hai ena vida natural. Dirigi, Aubert, el centru Terre Vivante, qu`es un modelu pa deprender téunicas agrícolas nel sen respetanti de la natura. Repito, durísimu horizonti.

D`otra manu, y depués de finar el libru de Carlos Taibo "El decrecimiento explicado con sencillez" (Edit. Icaria Antrazyt 2011), sigo anadando polas auguas lóndrigas del mundu la decrecencia col su máisimu voceru, Serge Latouche. D`esti autor leo`l libru "La apuesta por el decrecimiento", ondi rebata cualisquier asperanza nel sistema capitalista (digamos... ¿criminal?, ¿terrorista?, ¿desalmau?, ¿currumpíu?, ¿bárbaru?, ¿soicida?...) y enas guarismáticas soluciones a las enjosticias libráas pol desocoliñe generalizau (planetariu, hemisferial,  continental, estatal, autonómicu, comarcal, local...). Conceutos embuliqueros al simen del PIB, produtividá, ricura colómica, especulación, inversión, mercantilización, industrialización, moernización, autualización, mercau, prosperidá colómica, bienis, sirvicios, manu d`obra, prima de riisgu, bolsa, déficit, ... Indicaoris d`una vida mangullía pola colomía fantesiosa y anestasiaora de la rialidá cutiana, de la vida nel sen más ampliu.

A la final, torno al libru d`Aubert, conos sus gráficos atentu la destensión, espible y nantación de los efeutos nocivos de biocidas a la totalidá del territoriu y de la población. Onqui ya pruhibíu jaz 30 años, el DDT, sigui establi nel nuestru muerganismu, siendo causa de dellos desórdenis de la salú humana. U los cócktelis de los omnipresentis y persistentis pesticidas, que combinaos en dósis de 4, 5, 6 u jasta 9 componentis, están detar de gravis problemas de salú a livel planetariu. La fertilidá humana, particularmenti la masculina, está nitiamenti afeutáa por milentas de sostancias químicas que quedarán caltuvías nel cuerpu, complicando las sus junciones vitales y favoreciendo las maljunciones.

En jalguetas u en manguetas, quizaes l`endevinir de la humanidá, d`aquí a metá de siglu y tal y comu es currutu aguañu, alquier con toas estas declinaciones un escuru sedu que puei ser beneficiosu pa la vida ena Tierra. Aquella que mos sobreviva.

lunes, 13 de mayo de 2013

¿QUIES MERCAR ROPA "BARATU"?...

Los socesos del 24 Abril en Bangladesh tien que ser un puntu final d'esti mundu relochu, nu puée ser qu'en plenu siglu 21 el capitalismu global maneji asina la vida las presonas. Las madureras nu puéin ser mas alocinantis: 1.126 presona muertas (la mayoría mozucas cumu la de la jotugrafía) que trebajaban 12 horas diarias jaciendo ropa pala sociedá ocidéntal. El sueldu era de 30 euros al mes...abora paez qu'el gobiernu está estudiandu subilo. Esti chiringuitu testil muevi al añu 20.000 millonis d'euros en Bangladesh...cumu pa dejalo. L'esmane del Edifíciu La Praza Rana tien que ser un simbol, un enantis i un dimpués, pa que cambee esta sociedá tan consumista, que solu trae estas desigualdaes enti las presonas i la esplotación pa neños i neñas asgaya enos paisis mas probis del mundu, tóo pa que mosotros tengamos ropa "barata". ¿Merez la pena siguir con esti cambalachi autual? Yo cudó qu'estu tien qu'aparar ya,.por respetu, por ética.

miércoles, 8 de mayo de 2013

"MOERNA DE PUEBLU", LA PURA RIALIDÁ...

Raquel Córcoles es una moza de 26 añáas que debuja unos comis alocinantis, piru rialis cumu la vida mesma. Un trebaju mu recomendabli...cona qu'está caendo.

jueves, 2 de mayo de 2013

AFORISMU

Quimas y tronchos bien picau,
brullos y`l verde ya segau.
Tóo mestu y bien puchu,
es un burdíu que val muchu.




Con desplicación tan curta, pocu más añidir atentu la componencia l`antozañu.