JAMBRUNA

Unas entráas más abaju escribí un testu titulau CAVA POLA VITORIA que diba atentu la muvición entarajiláa pol gubiernu englés enanque`l su pueblu sofría las consecuencias de la Sigunda Guerra Mundial. Nesi escritu decliné qu`el suministru d`alimentos a Engalaterra, por aquel entós, sofría ataques marítimos y no bía una currienti cuntina d`esos bienis. Bien, agora, a manu vien aunir aquel testu col que escribo derreu, depués de leyer el libru Cojecha arrobáa de Vandana Shiva.

Hebo una gran jambruna ena India nel añu 1943. Más de 3 millonis de presonas morrierin y más de 20 millonis viérinse afeutaos por tala jambruna. D`aquella, la India era la base d`aprovisionamientu del ejércitu británicu, en guerra en dellos continentis. 80.000 toneláas de trigu juerin desportáas dendi Bengala, aondi allegaba`l trigu (y arroz) despropiau pol imperiu, una quinta parte de la produción india. La región de Bengala aportó dos terceras partes de la su cojecha. Cientos de milentas de presonas emigrarin a otras zonas d`India, comu Calcuta. Pol caminu medró la especulación y l`acaparamientu de los comerciantis que subierin los precios a buscu d`un beneficiu fácil. Medró`l númeru de cadáveris enas cunetas, mientres una marcha júnebre de labraoris, pescaoris y artesanos bengalís escarceaban otra tierra. Milentas de mojeris y neñas juerin vendías, cunvirtías en prostitutas. Los neños tamién juerin vendíos y, enas calles, los perros s`engarraban polos cuerpos de los quienis estaban más mortanos que vivos.

Al simen d`una quema, pola India s`espibló una muvición de mogura a la despropiación autorizáa pol Imperiu Británicu: la muvición Tebhaga. Tebhaga sinifica "dos tercios" y allegó a desarrollase en 19 distritos, participando más de 6 millonis de labraoris. Éstos, repuchábanse a dá-la su cojecha, siendo acusaos, entós, d`arrobu. Poca tiempu enantis, dendi`l tardíu de 1942, Mohandas Gandhi encetó l`apeldáa pola endependencia al griju de Quit India!, "¡marchin d`India!". Lo que sigui, es más u menos currutu por nos...