L`ANTICIPACIÓN

La estrategia l`anticipación requier una visualidá y una certía p`asganzar ojetivos de baju livel, pintu`l casu nel juegu l`ajedrez u, enti las grandes empresas tresnacionales, a una altor muchu mayor. Nesti últimu casu entran en juegu dellas componencias que consueldin esi proyeutu anticipaor nel que s`embarcan y no se vaiga, ésti, al tachu. Esti juegu d`estrategias y entramañas alquier nel mundu globalizau un geitu violentu, peru con viecos parcialis qu`estorreguin talangueras. Mijor polas güenas que polas malas. Trátase de caltené-la tobera enanque duri la comedia.

Grandis ojetivos de gobiernos y tresnacionales, entidaes ambas que son cuasi pal cuasi, sedrán l`escarceu de juentes d`inirgía, enteinase escarceando y ajirmando la posesión d`arrecursos, la omnipresenti propaganda y l`espible de las sus redes d`influencia. Los gobiernos caberos d`esti mundu s`escorrean, hipocritamenti, en dar una visual dabli de la su aición internacional, y d`otra manu, esa perralla s`encisca entumiando a probis gobiernos de probis países. Hai vegáas que sedrá enforma con una promesa al pajarón presidente de turnu, sedrá ésta una retaporción enos beneficios u facilidaes pa consiguir un pelotazu, que nestos tiempos d`encertía, convién tener bien comblau`l ralengu. N`otras vegáas, sedrá la diplomacia secreta la qu`encete los sus pasos. Estas muviciones aprendin las más destrañas migas y curiosos collazos de viaji.

Acancémomos de los interesis españolis en Latinamérica, con Repsol enchirtando los caminos enos callejos ministerialis. Endesa, Telefónica, Bancu Sanander, etc. Interesis al estrincote que pocu jacin pol bien públicu y general, que tienin una visual del mundu comu un negociu especulativu y desalmau. L`augua, el petroliu, el carbón, el gas, l`uraniu, el cobre,… jasta las granas son del apetegu de las grandis empresas del seutor: Monsanto, Syngenta, DuPont, Carhill, Diageo, Bunge, Unilever y Yara. Dendi jaz cuasi una década, estas empresas espiblan las sus clines de pulpe por tierras africanas. Tanzania desconoz pizootías qu`acemangan a las granas n`otros esgonces del planeta. Tanzania es un ojetivu caberu, peru tamién Burkina Fasu, Costa de Marfil y otros.

Amecémomos al su espiche atentu la necesidá d`alimentar a los paísis probis, de producir alimentos allí ondi s`atanguan. El güenismu escenificau. No sacarán a la luz que dendi que la libertá de patente está enas sus manos, cona descusa de cojechar “super-alimentos”, la jambruna es el platu que más se sirvi por meyu mundu, y sigui nantando; tampocu aventarán que los contratos leoninos juerzan a los agricultoris a soicidase al no ser a pagar el caricosti añual de las granas tresgénicas (casu descandalosu de la India) u, son despulsaos p`acupá-las sus tierras (Tanzania) u, finan cona soberanía alimentaria de los pueblos. Enanque las sus juchas medran, el restu la humanidá sobrevivi a gangu d`atraese, logicamenti, a esos ricos hombris de negocios del hemisferiu`l cierzu que viajan n`avión vestíos de deseñu, con corbatas de seda y antiparras escuras. Éstas, embotijan, a la empar que protegin la miráa de la crudura la rialidá desterior. Tamién están ajambraos, peru de lucru.