LA SESTAFERIA: abril 2014

jueves, 24 de abril de 2014

MAISIMU SECRETU

El testu que vien derréu, destriélo del blogue de Gustavo Duch http://www.gustavoduch.wordpress.com/. Vesitalo aminudu es siempri una lición d`aler.

"Desplícanme que va pocu las 10 multinacionales más poderosas del mundu aliárinse nun interesanti escurciu corporativu p`arresindiá-las sus ventas, afeutáas comu están pola cris autual. Adeicando abondos arrecursos colómicos, humanos y 16 mesis de trebaju, asganzarin tolos esgonces del planeta pa ser a cuntar cona encuesta d`hábitos más completa qu`enjamás haiga desistíu. L`ite la custión era escarcear ¿qué mos jaz felicis? Con programas d`informática estadística analizarin y acurriarin cáa una d`esas millones de retrucas, obtuviendo los surtíos que vienin derréu. Lo que mos jaz feliz es:

Anear nel somantu a un/a naciatu/a y sintir el su lí, nuéu y poderosu.
So la sembra d`una jiguera, una cajiga, un ácere, un frisnu u un salci, ascuchar el son d`una guitarra, de la gaita, d`una frauta de pan u del kotu japonés, en compaña de la voz del poeta.
Acurriase con familia y amistaes, de siempri u por destrenar, al rote d`una mesa u nel poyu de la praza y, mientres las miráas s`atopan, charrar, debatir, paliquiar, contar y ascuchar.
Un esgonce, una luz segle, una infusión, té u café y el silenciu atanguáu pa desfrutar del libru enti manos.
El resobe d`un cuerpu amáu, el pole jechu y recibíu y, entós, destremecer. El besu que deja ensín aliendu.
Cuandu el sol remanez, jincá-las manos ena tierra ensimentáu, regá-los geranios del correor, cojechá-las allandas temporáas, cillá-las vacas...
Abuzar nel silenciu marinu, sintiendo l`oleaje segle sobri tí, u nuna poza fríu ondi remansa l`augua d`un ríu a buscu del su distinu.
La charra, la tertulia, l`acurrie, el conceju -de cuandu clandestinu, de cuandu no- conos quienis cudan apaicíu, pa confabular cómu tresjormar el mundu, pa soñar comu tresnalo. Y jacelo pusibli.
Una cambalúa, pa unos/as destrema y aventuráa; pa otros/as, viejucos, curta y allanáa, pol boscu, por picos y jeneros u pola alameda que va del pueblu a l`armita. En primovel, cuandu despiertan los pájaros.
El varcíu, alendando al sol.

Y asina jue que nel encete del su fabulosu plan de marketing, las diez corporaciones aprendierin que dengunu de los nuestros verdaeros placeris no son a molos vender, ne semos a mercalos. Porque ENA NUESTRA FELICIDÁ TAMIÉN SEMOS SOBERANOS/AS".