Tenemos jambri y, por qué no dir a un restauranti. Con seguranza comeremos bien, con calidá, con güenos produtos y güen arti. Echando manu de la nuestra moroya, curta nestos ámbetos, acancémomos de la casa de cumías más arrecomendáa. Trátase del Ristorante Partíu Popular, el dotáu de más premios, distinciones y menciones de manu de la prensa escribía, l`arradiu y de la pantalla de televisión. Hai otras casas de cumía, peru mos dicin que no son de fiar, que tienin desperencia pocu y la que tienin no es de confianza. Nu vamos a jugámola. No está el jornu pa bollos. Amos a dir a lo siguru.
Mos jaz compaña la suerte nesti ojetivu, el Ristorante Partíu Popular es una franquicia con tantos comeoris que sedríemos a gozar de los sus boquiblis tolos días del añu nun restauranti diferienti, enclusen, adonándomos bien la cosa, mos arrañaríemos bien a los sus platos años enteros, ensín repetir local ¿Qué más semos a pidir?
Es verdá que la marca Ristorante Partíu Popular tien inimigos, detratoris que declinan que los sus platos no son de calidá, que los sus chefs no son güenos profesionalis, que no están áhi pa quitá-las jambres del pueblu. Quizáes estas críticas vaigan arguye, amencia, pola solengua de los otros restaurantis repuchaos al comeor azulienti (préstalis esta color). Chefs que quítanse la jambre los primeros, dicin que. Jefis de sala que tienin la bigornia, la zuna de comé-las mijores viandas y boquiblis, dejando los rebusis y estoceros a los comensalis, dicin qué. Mermuraciones, digo yo. No es pusibli que tanta jatera siga ensemble nun proyeutu hosteleru comu el del Ristorante Partíu Popular. No se contendría, cudo yo. Dijíu está, amos a dir al más afamáu restauranti celesti celestial.
Al entrar picamos el pínfanu y mos oldean bien, parcialis, deshiciéndose por nos. Tóu es azul, decoráu con gaviotas y nubis. Tenemos la sensación d`estar nun restaurante marineru. Bien paez. Mos asientan escontra la paré, nuna ala del restauranti que sal del comeor principal. Tienin arreserváas dellas mesas a clientis importantis, dicin que. Asperan a genti asgaya, están amezaos a esi labarientu. Hai genti hiciendo tiempu, asperando, polos sus viecos tienin jambri. Nel aparcaeru bían cambionis, siñal de que nesta casa cómese bien, estu es currutu. Bía una ambulancia, peru conas lucis apagáas. Nuna mesa juntana hai dos camilleros, una ats y un mélicu hispíu que no deja de jacer gromas y beber vinu. Unas parejas de bolsu de marca y zamarra de piel de bichu caru. Corbatas, gomina y perjumis arrescendientis; car a nos, ena zona lúndriga ensín ventanas, genti de barriu, una descursión de jubilaos parlan a grijos egual qu`un bálamu de gurrionis. Un vendeor de siguros en solidez, una ruya de tangue con tanga coloráu, a petu de la su madri col pelu panoju, jidrando un sudu espesu. Aventa un abanicu con publicidá de qüisqui español, con bandera a juegu conas banderas de las parés, de las sillas, de las mesas, del techu. Otru bálamu, nesti casu silenciosu, de monjas, avilando al rote. Enanque, a pie jitu, un maitre de camisa plancháa y barba afitáu, va acaldando a tantu comensal comu entra enas salas. Unos dirán brumíos, otros, bien jolgaos. Esti restauranti paez de confianza y seriu.
Uyan mucha, mucha tiempu p`atendemos. Vemos al maitre aspavientar y risar con güenos y parcialis viecos, enanque dos guardias cevilis finan la su consomición nel bar. Los camareros ateclan a una señorona de culu anchu que va por sigunda vegáa al sirviciu. N`ambos casos, una camarera enchirta`l su caminu enti las ringleras de sillas. Tenemos un reloje de pecu a petu, ena paré petu a nos. A la drecha hai una televisión con un partíu de jútbol, el vulumin está altu. A la isquierda hai otra televisión encesa, peru col son quitáu. Dan una pilícula de Paco Martínez Soria. Está cruciando una calli con una maleta y un curdiru, dulda, resulla, galga`l tránsitu, la mesa de jubilaos ríi. Tengo jambri.
Entradas
