¿Qué linte desepara l`hier del mañana?
¿Es tan sotil comu l`estante deseparaor del aliendu de la vida y la cesía de la muerte?
¿Sedrá al simen de l`alendáa enti las trelumbres del albiar y el remanecer?
¿Sedrá esi tiempu costodianti del cuntaeru de las glajáas, de las rosáas, de las rojanas, de los charpazos?
¿Echará una varáa de las llampas que s`espetellan nel pelímetru la tierra?
¿U, quizaes, inquirirá la midía de la muvición de los continentis? ¿A diariu? ¿Seimanal? ¿Mensual? ¿Añual?
Es esi vanu y humanu cuntaeru, el culpabli de las nuestras maleras y entrequidencias, acolechos y enfelicidaes.
La posesión del tiempu, a golpis de martíu nel yuncle y con tóos nos desapreviníos, es la última engatáa d`esta sociedá ensín amañu.
Si la nuestra nacencia, anestasiáa, arrefaña los pujos a hincha de las naciones surcías pol negociu la melecina y, al colombru la nuestra vida, la muerte anegrez acialáa enos carrejos de los rebumbiantes hespitales ¿Sedremos a usar dicir que la remesa enti talas cúspices vitales vivímola libris? No, sedrá la retruca.
L`atragantu de toa esta entramaña es que mos sabemos encuciaos a la duendura. Vae jaba.
Encontóo, una raíta d`asperanza surdi nuna resquieza nel nuestru buru presenti: quizaes, el nuestru endevinier no esté talmenti deciníu ne encalzau y, esa jalta de seguranza, por mor de la jalta de control sistémicu, sea pa nos una asperanza de libertá.
En toa manera, el tiempu es un bien del cual el sistema s`apropia. Es otru meyu de control y lo que nel encete d`esti testu s`atraía a un poema, tórnase una acemanga sembriega.
Entradas
Latagudu testu...cuantis caviles trujo a la humanidá esti pasu del tiempu y cuantis obras genialis: "En busca del tiempu esmanau" de Marcel Proust, Las coplas de Jorgi Manrique, ect.
ResponderEliminarA.C.